流浪記

成日都係屋企等運到，再唔係落街行黎行去都係果幾個難鬼地方，超悶蛋！E！佢去掉垃圾，等我偷走出去玩個夠先！係神不知鬼不覺間，我好似陣風咁飄左出去！咁得咁橋，度電梯門打開左，我一支箭標入去！心諗，好！等我自已出去流浪下先！開心得我呀！

落到街，第一件事，梗係好似平時咁，擺個堆先！平時不嬲都係到擺堆，但今日D人唔知點解，個個人都指指點點，又話叫警察，又話罰我千五蚊，D人都，三十六著就為上著！

等我過對面馬路先，嘩嘩嘩，架架車都必必聲，差D撞埋我度，嚇得我呀！平時D車會停低俾我行，今日個個都痴左線！唔理咁多，繼續自已去玩先！

行去邊好呢？平時我自已就衝衝衝，反而無狗帶都唔知前後左右行邊樹好！原來矛目標都唔知點好！既然偷走左出黎，唔理咁多有路走行！

好渴呀，平時有人斟茶遞水，而家好口渴呀！裡面有樹蔭，入去抖抖先！突然間，有個藍色衫人，走過黎，話呢度唔歡迎我，呢到係"功遠"喎！叫我D快走！重指住個圓圈加一撇公仔！離晒大譜！

唯有再向前行先，呢度好涼快呀，有冷氣！等我入去嘆下老冷先，都末行到入去，又有個人類物體走黎趕我走，話"傷長"唔俾狗入，立入禁止！有無搞錯，呢到唔入得，果到又唔入得！超激氣！平時都唔覺咁多地方唔歡迎我！

又熱又渴又肚餓，個太陽好似同我有仇咁，呀！我記得前面有間餐廳，我成日都去！每次坐低都有小食，有水飲，有風扇！我記得叫做BB30！等我去BB30 HEA 下先！終於到左啦！平時D人都笑笑口，今日唔知點解，啤住我，話唔歡迎我！我淨係記得入面唔坐得，今日連出面都唔得，好驚呀！全部人都痴左線呀！

我真係好渴呀！馬路邊有水喎，等我飲啖先！好臭好苦呀！突然有人走埋黎想捉我，又話查我身份証！原來係捉無家可歸果D流浪狗"愚聾處" 人，佢成日用"愚聾處" 嚇鬼我，今次真係俾我撞到！佢話好彩我有一粒身份証係背隻，如果唔係……我梗係襯佢講廢話果陣時逃跑啦！

好驚呀，好可怕呀，我唔流浪啦！快D返屋企先！有紅色車呀，我平時都係搭佢返屋企！等我跳上去先，我都末講去邊，佢問我有無錢！咩錢呀？唔係上車跟住到左就落車咩！要錢咩？我又俾人趕走啦！

好彩我認得條路，幾經辛苦，終於返到屋企樓下！有LIFT啦！入去先！點解開門閂門又係呢到！又閂門，又開門都係呢到！好似撞邪咁！好驚呀，好可怕呀！

最後終於返到屋企！個心重震緊！

突然有把聲：唔好發夢啦！

原來我發夢，嚇得我呀！我唔敢再要求多多！我唔敢再流浪啦！兩餐一宿已經巧巧啦！唔好趕我走呀！真係在家千日好，出外半朝難！